Алан Салбиев (alansalbiev) wrote,
Алан Салбиев
alansalbiev

Хицауы хай

   Ацы къуыри æрхаста бирæ цымыдис цаутæ. Иутæ сты худæг, иннæтæ - худинаг, фæлæ уыдонæй уæлдай, зæрдæ цæуыл фæхæца, ахæмтæ дæр дзы ис...
   Райсæм Хуссар Ирыстонæй цы хабæрттæ хъуысы, уыдон. Фыццаг нын загътой, ома, Кокойты Эдуард кæй баныхас кодта Хуыбылонимæ æмæ йæ бынат кæй уæгъд кæны. Уымæй, дам, ахæм уынаффæ цæмæй сырæза, уый тыххæй Уæрæсейæ сæрмагонд бæрнон кусæг Виноградов уыдзæн æвдисæн.
   Фæлæ, хъыгагæн, Эдик йæ ныхасæн хицау кæронмæ нæ разынд. Фæтыллиф кодта - бавдæлыд, æмæ йæ бæрны цы барадхъахъхъæнджытæ æмæ тæрхоны лæгтæ уыд, уыдоны алы мадзæлттæй сæ бынæтты ныууагъта. Ныр уæдмæ Хуыбылон та йæ сæрылхæцджыты Чъребайы уынгтæй айста. Уæдмæ инæлар Баранкевичæн йæ хæдтулгæ æнæзонгæ фыдгæнджытæ басыгътой (куыд æй зонæм, афтæмæй ацы хъайтар æмæ куырыхон лæг дæр Хуыбылоны сæр рахæцыд).
   Дарддæр цы уыдзæн - Хуыцау йæ зонæг, фæлæ та ацы хатт дæр Эдик йæхи равдыста мæнгардæй.
   Цæгат Ирыстоны ацы къуыри бæрæг кодтой Абайты Васойы 111-æм гуырæнбон. Уымæй уæлдай - ссæдз азы размæ уыд ирон адæмы фæццаг иумæйаг æмбырд. Уый хыгъдмæ аппæтдунеон ирæтты змæлд сарæзта арфæйаг мадзал, кæцыйы фембæлдысты хистæр æмæ кæстæр фæлтæртæ, бæстон æрныхас кодтой ирон адæмы, ирондзинады хъысмæтыл.
   Цыдæр æнтыстдзинæдтæ дæр бафтыд нæ къухы.
   Нæ ахуыргæнджытæ ног технологитæй куыд арæхстджынæй пайда кæнынц, уыцы бæрæггæнæнмæ гæсгæ Ирыстон æппæт Уæрæсейы размæ рацыд. Кадджын фыццаг бынат дих кæнæм Тæтæйрæгтимæ. 
   Хъыгагæн, фидиссаг хабæрттæ дæр æрцыд. Зæгъæм, насвай кæй хонынц, уыцы марг нæ фæсивæдæй бирæтæ райдыдтой пайда кæнын, канд лæппутæ нæ, фæлæ ма чызджытæ дæр. Сæ рæзгæ буархъæдæн, æнæниздзинадæн зиан кæй хæссынц, ууыл ничи хъуыды кæны. Сæ ныййарджыты, æвæццæгæн, не 'вдæлы бæстон уыцы хъуыддагмæ æркæсын, рæстæг сын нæй.
   Æппæт Уæрæсейы цаутæй мæн фæнды раргом кæнын ахæм хабар - æвзæрстыты бæрæггæнæнтæм гæсгæ парти "Иугонд Уæрæсе" бирæ хъæлæстæ кæм нæ райста, уыцы бæстыхæйтты хицæуттæ æрцæудзысты æфхæрд.
   Йæ куыстæй уал систой Вологдæйы сæргълæууæг Вячеслав Позгалевы. Уым "Иугонд Уæрæсе" сæмбырд кодта æрмæст æртыккæгæм хай æппæт хъæлæсты нымæцæй. Ацы хабар мæ дисы бафтыдта. Кæд адæмæн сæ зæрдæмæ нæ цæуы хицауад, уæд бынæттон кусджытæ цы азымджын сты? Æхца иууылдæр ис Мæскуыйы къухы, бынæттон хицауадæн сæ бартæ байстой, сæвæрттой сæ уыцы уавæры æмæ æрмæст хъæуынц уæлейæ сын цы зæгъой, ахæм уынаффæтæ æххæст кæнынмæ. Уæд сæ цæмæн æфхæрынц? Адæмы хъæлæстæ мæнг нымæдтытæ кæй нæ акодтой, уый тыххæй? Æвæдза, цас рæстзæрдæ дæр уай ацы мæнгард дунейы, уыйас æфхæрд фылдæр æййафдзынæ...
   Иннæ къуыримæ дæр та, Хуыцауы фæндæй, кæд дзæбæхæй фæцæрæм, уæд майрæмбоны ивгъуыд хабæртты ног афæлгæстмæ æнхъæлмæ кæсут. Уæ цæрæнбон бирæ!

Хуызистытæ: ИТАР-ТАСС, AFP


Tags: дайджест событий за неделю на осетинском, къуырийы афæлгæст
Subscribe

  • Post a new comment

    Error

    Anonymous comments are disabled in this journal

    default userpic

    Your reply will be screened

    Your IP address will be recorded 

  • 26 comments